唔想坐正同Peter拍住上

坦言暫時對主教練職位不感興趣的「豪哥」，仍樂於協助昔日隊友文彼得（Peter，左）領軍，再次跟好兄弟拍住上︰「Peter本身都係由球員轉教練，所以喺呢方面會比其他教練好啲，始終佢踢得耐，佢會知道踢大賽嘅時候，球員會需要啲乜嘢，呢樣嘢對佢嚟講係一個優勢。我嘅責任就係喺個球場度做好啲，做啲我認為啱嘅嘢畀球員睇，等佢哋去學習，呢樣嘢可以話係我同佢嘅分工，因為始終佢係教練喺外邊睇嘅嘢，同我喺球場入邊要求啲球員做嘅嘢有啲唔同，但係總括嚟講都係想班後生仔好啲。雖然佢係一個經驗未係咁多嘅教練，未必有年輕球員會驚佢嗰種元素，喺威嚴呢方面係缺乏咗啲，但係啲球員會比較容易同佢去表達，因為大家唔會話有太多隔膜，我諗呢樣嘢有好有唔好！」