陳偉豪知識態度缺一不可

要做一個稱職的後衞,敢於「碰撞」、敢於「提場」是必需的。然而,今季加盟香港飛馬的陳偉豪,儘管在球員以外還多了「助教」這個身份,惟操練時依舊穿上球員用的訓練球衣,「豪哥」笑言雖然銜頭不同,但他所扮演的角色並沒有太大改變——無論場外場內,都會站在隊友的背後,以廿載球員經驗,向年輕一代作出最堅實的支援與指導,用心去「提場」!

相比起足球教練在其廿年職業球員生涯中所經歷的演變,「豪哥」認為教練對球員態度和戰術技巧的要求,兩者缺一不可︰「以前教練着重球員嘅態度,無論喺比賽定練波,都要尊重番自己職業。依家嘅教練就有好多技巧同戰術嘅嘢,去令到隊波進步。我覺得兩者都係需要嘅,只不過以前嘅足球喺戰術要求唔多,右翼就係出波,防中就係防守,跟住10號仔就係派牌。」「豪哥」續道︰「以前啲嘢係定死咗,但係依家好多嘢都講求配搭、講求戰術變化,我哋隊波咩嘢球員都有,有天分高嘅球員,但係我覺得個態度可以再做好啲;相反,有啲擁有良好態度,不過喺技巧上唔係太好嘅時候,我哋咪畀多啲知識佢,因為知識嘅嘢我哋傳到畀佢,但態度呢方面,佢哋嘅心態唔變,我哋點幫都幫唔到佢!」

貫徹「輕鬆事、認真做」

除了具領導才能,「豪哥」亦出名「口水多」,不過他亦有「輕鬆事、認真做」的時候︰「我覺得適當嘅玩笑係對球隊氣氛好啲,但係操練踢分組賽嘅要求都好高,雖然話係玩,但都唔想輸,又或者去諗點樣去踢好啲。遊戲係教練set畀我哋玩嚟輕鬆,但輕鬆得嚟你都要認真咁去玩。玩唔係求求其其去玩,你認真去玩都可以好好玩。你點樣去認真對待一樣嘢係好緊要。」

年輕球員要將勤補拙

談及現今的年輕球員,「豪哥」則寄語他們需要將勤補拙,否則只會浪費更多時間︰「有時我都會勞氣,覺得佢哋嘅條件唔係咁樣。其實唔止係我哋球隊,我呢幾年接觸過好多年輕球員,我覺得佢哋好慘,因為佢哋由細到大冇人教佢踢波,就算佢哋踢過好多青年隊同比賽,其實你一行出嚟踢職業,就睇得出佢哋喺進步最快嘅年紀冇吸收到知識,只不過喺個技術層面,踢得多就自然會好。不過我哋唔會怪佢哋,只係會怪佢哋到依家都仲未識點去改進自己,又或者每日見到佢哋有少少進步,都已經好開心,但係如果踢咗幾年都未有進步,我係覺得有啲可惜。」

圖/文︰何彥霆