高級組銀牌8強雙響炮
「高級組銀牌賽」8強今日開打，頭場下午2時30分假青衣運動場上演，由富力R&F對香港飛馬；尾場假旺角大球場於下午5時30分鳴笛，由早前曾於港超聯賽碰頭的東方龍獅與冠忠南區爭奪4強席位。
富力R&F香港飛馬鬥火力
香港飛馬雖然仍未取得聯賽首勝，但盃賽卻有不俗表現，銀牌首圈淘汰愉園，「菁英盃」更先後擊敗標準流浪及理文，惟主教練文彼得強調球隊需改善把握力︰「上場聯賽對南區其實發揮得好好，射門次數20射8中，大家埋門次數都多，對觀眾嚟講係好事，但能否將此變成入波，呢樣嘢我哋要嚴厲去改善同執行，把握力不足都唔係第一次發生。」「文Sir」透露門將梁興傑早於之前對理文一仗賽前熱身時弄傷肩膊，並負傷披甲踢足全場，他與文迪斯及上仗受傷的馬高斯，今仗均上陣成疑。
楊正光準備定加時
近兩場聯賽均於主場大勝的富力R&F，主帥楊正光對球隊表現及火力均感滿意︰「上場對理文表現唔錯，尤其係埋門能力逐步提升，連續兩場聯賽都入球較多，增加咗整體信心同士氣，不過都有地方需要改善，我哋某啲時間集中力不足，導致畀咗機會對方。」
「光Sir」同時警惕球員，表示香港飛馬愈踢愈進步，絕不容忽視︰「飛馬今年人腳變動較大，季初未算太理想，但近3仗所見每場都有進步，上場佢哋對南區亦控制住比賽嚟踢，所以今場波唔易踢，要有加時甚至互射12碼嘅心理準備。」
東方龍獅冠忠南區快打快
東方龍獅自上月在聯賽1球不敵冠忠南區後，近兩仗於菁英盃及聯賽均以2比1擊敗傑志及愉園，主教練李志堅認為上仗對愉園已能主導比賽，但防守方面仍要下苦功︰「上場波好快就2比0，而對手嘅攻勢好零星，但唔能夠好好取爭到第3球，畀對手嘅罰球攻勢追近，去到下半場都預計到領先住1球嚟踢，最後廿分鐘會好辛苦。我諗喺防守死球方面，或者係應付傳中波，都要去溝通吓點樣改善同調整。」
對於再遇南區，「堅Sir」認為是「五五波」，強調勝負取決於球員臨場發揮及心態，特別是南區近期持續表現出很強的鬥志，傷患方面則仍有利馬在重拾狀態。
Ricky用速度抗敵
上仗聯賽補時逼和香港飛馬的冠忠南區，主教練鄭兆聰雖滿意陳港斌及許宏鋒傷愈後的表現，但同時直指一些弊病要根治︰「上場大家實力都好接近，人哋有攻門自然會受壓，檢討之後發覺我哋有啲決定唔太理想，不過我哋有段時間組織幾好，問題在於可否維持到。」對於東方最近兩仗僅小勝對手，「Ricky」認為或跟狹窄場地有關，希望今仗能夠利用夏志明及許宏鋒的速度，為對手製造麻煩。