餓虎激鬥!

「中銀人壽香港超級聯賽」今午2時30分重燃戰火,富力R&F將於主場廣州燕子崗體育場迎戰佳聯元朗,同一時間和富大埔在大埔運動場擺擂台恭迎傑志。受賽事延期及國際賽期影響,部分球隊超逾1個月未有比賽,如今港超聯再度展開,熱愛本地波的球迷切勿錯過!

和富大埔傑志搏甩髀

尚未打開聯賽勝利之門的和富大埔,上輪在兩度領先下與東方龍獅踢成3比3,主教練之一郭嘉諾認為:「球員失咗第1球之後,驚輸番轉頭,所以我覺得如果球隊喺領先2比0時,繼續Keep番之前嘅踢法,結果會唔同。我哋會調整番球員心態,話畀佢哋聽唔好怕輸,因為愈怕輸就愈會輸。」

和富大埔早前曾與兩支港超球隊進行友賽,「嘉諾Sir」喜見球員狀態不俗:「全部球員都好弗、好餓波,今場我哋冇保留,特別係我哋少兩個外援,進攻少咗板斧,但我可以落番啲體能強啲嘅球員去做前場逼搶。」球隊目前有前鋒金玟基、勞高停賽,傑志借將中村祐人和新加盟的澳洲中堅雲美亞斯則可以候命。

施帥:要畀驚喜球迷

作客的傑志已有逾一個月未有正式比賽,期間曾與東方龍獅「拍跳」,主教練施利斯高域明言眾將已準備就緒:「我好滿意球員體能狀態,但始終有一個月冇比賽,佢哋比賽心態冇咁好。不過我哋已經準備好去應付今場比賽。雖然今場對大埔係一場難踢嘅比賽,但係我哋好有野心、好想贏,希望畀到驚喜大家!」

「施帥」亦指今仗勝負睇自己:「我哋有睇大埔上兩場嘅表現,知道佢哋嘅踢法。傑志要踢得比佢哋好,球員落到場要付出100%之餘,亦要踢得更整體,只要發揮出水準,我有信心可以贏波!」人腳方面,前鋒盧卡斯、中堅霍斌仁、中場史雲斯頓正在養傷中,預料難以上陣。

富力R&F迎佳聯元朗

近兩輪聯賽均需改期上演的富力R&F,對上一仗已是上月不敵冠忠南區的「菁英盃」分組賽,主教練楊正光坦承相繼有賽事延期,對球隊的安排及球員狀態均有影響,但慶幸能趁機讓林志堅等傷兵有更多時間恢復。「光Sir」又認為佳聯元朗實力不容忽視︰「元朗今季雖然有好大轉變,但無論本地球員抑或新外援喺之前嘅4場比賽都有驚喜表現,尤其中場米基爾絕對係重心人物,所以我哋必須要好好提防佢哋嘅組織進攻同後上能力,加上之前佢哋逼和過兩支強隊,睇得出佢哋遇強亦不失信心。」

陳文俊:防守反擊制敵

佳聯元朗上一仗已是3周前的聯賽,當時元朗跟冠忠南區打成1比1平手,主教練陳文俊透露曾透過不同方法,保持球員狀態及對比賽的飢渴感:「球隊長時間冇正式比賽,球員對比賽嘅感覺同戰意係會低咗,但我哋已經盡力用練習同友賽去催谷體能,但唔會當季初咁操,相信球員表現唔會有太大走樣。期間我哋亦有舉行一啲例如燒烤等活動,等佢哋鬆一鬆,練波時再投入番。」

「陳Sir」亦表示,由於球員需要舟車勞頓及適應球場,出戰如富力R&F這些球員均具個人能力的強隊時,不傾向於前線採取主動,會選擇防守反擊的踢法。至於人腳方面,黎厚希及鄭璟昊分別因傷及私人理由沒有隨隊北上。