去季曾因向球證質詢而被判停賽3場的許嘉樂，回想起當日一事，雖然否認自己做錯，但強調日後將會以更成熟一面示人：「無論踢邊隊、有冇份落場都好，我都會為隊波搏盡。嗰場波我只係去問球證『點解、點解、點解？』你話域陀駁你嘴，但眾所周知域陀英文都唔識，我問你點解你唔答我，反而將其他人講嘅粗口寫埋落我度。事後我都同球會分析過，奈何當時我養緊傷，如果唔係傷嘅話，球會一定會幫我上訴。呢件事之後EQ一定進步咗，原來好多嘢喺現實啱，就一定啱，原來好多嘢可能係唔啱，但最尾蝕底嗰個係我自己，所以我承認自己喺呢件事上面唔夠成熟。」