杜馬思準港人‧盡講情

「靚女，凍檸茶走甜唔該！」訪問當日記者相約杜馬思在一間茶餐廳暢敍，能如此地道嗌「凍檸走甜」，背後不僅是「加兩蚊」，更大意義是用6年來適應這個地方。Tomas憶述來港初期，因不諳英語，每次外出遇上問題，就要致電同鄉列卡度詢問，直至一日覺醒不能依賴他人，自始發奮圖強學習廣東話，今日終不用再「有口難言」。

香港的生活質素，對一些相對落後的國家來說像天堂般美好。但杜馬思直言香港百物騰貴，生活並不如想像般容易。Tomas過往曾被安排入住深水埗區的宿舍，給了他一個深入了解香港的機會：「所有嘢都好貴，日用品、嘢食、泊車等都貴到離譜！」他特別提到香港和巴西的房價差距：「如果喺度買一幢村屋可能要成幾百萬，但喺巴西只要40萬左右！」

港人乜都要快 特質外冷內熱

最令杜馬思感「頭痛」的還是文化差異：「香港節奏好快，行路、食嘢樣樣都要快。反而巴西人做乜都好Relax，用心去享受生活。喺香港隨街問路可能會畀人黑面，但巴西係好興隨街同人傾偈，或者係因為香港人唔係咁易信人。」

不過Tomas現時已了解到香港人其實是外冷內熱，他表示現在時常與本地朋友聚餐暢談，需要幫忙時他們永不「托手(月爭)」，令他漸漸融入這種相處模式，更笑言結識異性朋友時，他不會如初來埗到時般急進，反而會嘗試由淺入深地了解對方，先得到她們的信任。

杜馬思總結每個地方都有自身問題，但同時亦擁有着獨特的優點，他引一例來說明：「舊年巴西有場大型抗議油費嘅罷工，當時其實好多人都唔關注，甚至有人會反問『點解我要理？』相反港人就較熱衷社會事務，勇於為自己家園發聲。」這名在港落地生根的「準港人」，已期待一年後代表港隊為「家」鎮守防線：「出年我會帶埋媽咪同個女嚟香港住，代表香港就好似夢想成真咁，如果有幸做到我一定會傾盡全力！」

圖／文：骰仔