到狼隊跟操眼界大開

大家好，我哋係參與Golden Chance足球交流訓練計劃嘅學員鄧子誠（圖左）同龍梓軒（圖右）！首先我哋非常感謝球會同狼隊畀我哋一個千載難逢的機會，能到狼隊嘅訓練基地同佢哋嘅U18球員訓練。記得首課訓練時，我哋已經感受到同當地U18有所差距，佢哋速度快，體形比我哋「大隻」，而且佢哋每日都訓練，不斷咁做Gym，恍如職業球員一樣。當地球員無時無刻練波都分外認真，因為佢哋連後備都要爭位，競爭相當大。能夠同佢哋一齊訓練，完全可以感受到佢哋嗰團火，令我哋不敢怠慢。經過短短嘅旅程，除咗令我哋學到一啲新技術外，仲令我哋體驗職業足球員嘅生活，當地球員嘅精神態度，令我哋獲益良多。