港隊復操 葉鴻輝︰撼伊朗要搶分
正積極備戰「2022世界盃暨2023亞洲盃聯合外圍賽第二圈」的香港代表隊，雖然大軍剛在前一天才從柬埔寨回港，但昨日復操未見疲態，收操後更出席中秋節活動，一眾港將更化身「大細路」，笑到見牙唔見眼。
首仗作客與柬埔寨未能全取3分，對球迷來說難免有點失望，昨日收操後，主教練麥柏倫拒絕接受訪問，似乎心情麻麻，惟門將葉鴻輝透露球隊已收拾心情，以迎接周二（10日）主場對伊朗的賽事。去年曾參與評述世界盃工作的「阿輝」指自己難忘伊朗的比賽，形容對手為「世界級球隊」：「最深刻係伊朗對葡萄牙嗰場，如果前線有個把握力好啲嘅前鋒，我諗嗰場波已經贏咗。佢哋實力一定係喺香港隊之上，我哋盡量要去堵塞位置、減少佢哋嘅進攻機會。」他同時表明要以搶分為目標：「雖然係難，但係以往我哋對啲好強嘅對手都可以守和到，希望星期二場波都做得到！」
出席中秋節活動玩到癲
在完成訓練後，除主教練麥柏倫外，一眾港隊成員不但在冠忠巴士集團有限公司所提供的專車前合照留念，還參加足總安排的中秋節活動。球員分為3組玩遊戲，分別為食月餅估味道、寫大字，又朗讀祝福句子。活動期間，球員的笑聲從未間斷，想必他們相當享受這次過節活動！
陳焌鏗報道