7‧24大球場鬥傑志 曼城6星鐵定來港
香港球迷今個暑假最期待節目，必定係今個月24號喺香港大球場上演嘅「賽馬會傑志中心盃」，由傑志挑戰英超盟主曼城！亞洲之旅係曼城季前集訓重要一環，「藍月亮」昨日喺官方網站宣布，奇雲迪布尼、史達寧、貝拿度施華、利萊辛尼、大衞施華同基爾獲加6大球星，鐵定會參加今之亞洲之行，其餘球員名單會喺星期六公布。
由於阿古路、加比爾捷西斯等啱啱踢完美洲國家盃嘅球星多數唔會隨隊，所以曼城就提早向球迷派「定心丸」，講明其餘主力會悉數登場，其中德國翼鋒利萊辛尼一直被傳可能離隊，佢嘅參與無疑係一大驚喜。仲有，曼城今夏用7,000萬歐元收購嘅西班牙中場洛迪卡斯簡，已經隨大軍操練，《曼徹斯特晚報》估計呢位猛將極可能會喺亞洲之行亮相。
基爾獲加期待「東遊」
曼城今年亞洲之旅行程緊密，嚟香港前先會飛南京同上海參加英超亞洲盃，24號鬥傑志之後亦會轉飛日本對橫濱水手。英格蘭國腳基爾獲加表示期待今次訪華：「中國球迷好可愛、好熱情，佢哋好鍾意英超。有機會去唔同國家體驗唔同文化，同時為曼城吸納更多球迷，將會係好好嘅經驗。」
傑志1日2課迎硬仗
至於月初正式開操的傑志，大部份球員已歸隊，並積極準備這場硬仗。現時「藍鳥」每個訓練日均進行兩課操練，上午體能訓練；下午球隊操練，以助球員盡快回復狀態。從越南國家隊來投的韓籍體能教練裴鋕垣認為，香港球員缺乏強壯的身體質素，是因為他們平常忽略了鍛煉力量。而甫上任的他首要任務，便是憑豐富經驗和專業知識，藉此增強本地球員身體內的潛在力量，助傑志以十足狀態迎戰「藍月亮」。