安東尼戴維斯過檔湖人幫「大帝」手！ESPN等多間美國傳媒報道，湖人已經同塘鵝達成協議，「一眉道人」安東尼戴維斯（AD）下季將披上紫金戰衣，同勒邦占士拍住上，絕對係來季NBA首單重量級轉會。
消息話湖人以波爾、恩格林、祖殊赫特3位年輕球員，及嚟緊NBA選秀嘅第4選秀權在內嘅三個首輪選秀權做籌碼，換嚟安東尼戴維斯來投。其實26歲嘅「AD」今年初已經向塘鵝攤牌，話想過湖人，兩隊亦進行過談判，可惜條件上有分歧最終交易告吹。安東尼戴維斯上季獲得場均25.9分、12個籃板及3.9次助攻，絕對可以成為勒邦占士嘅得力助手。
湖人一口氣用多位球員做籌碼其實仲有另一意圖，就係為騰出薪酬空間，再簽入另一位星級球員，實行打造新三巨頭組合，希望喺強隊林立嘅西岸突圍而出，據傳黃蜂控衞甘巴獲加將會成為湖人下一個目標。
湖人成功羅致「一眉」後亦獲博彩公司睇好，成為來季奪標大熱，總冠軍賠率由1賠4變為2賠7，屬全聯盟頂頭大熱，至於衞冕失敗嘅勇士，由於下季陣容可能大變，賠率冷到得1賠11，排喺1賠6嘅公鹿及快艇之後。