籃網擬撬KD同艾榮拍住上
NBA總決賽Game 5明晨（11日）上演，總場數落後1比3嘅勇士，呢場再輸就無緣衞冕，可惜王牌球星杜蘭特（KD）據報仍然受傷患困擾，雖然他有隨勇士大軍前赴多倫多，不過美媒表示KD傷勢進展未如理想，今場生死戰上陣機會唔高。
然而，萬一勇士衝冠失敗，「三巨頭」隨時會拆夥！事關今季完結後，KD將會回到自由市場，據悉湖人及紐約人已對呢位前鋒流晒口水，不過近日美國傳媒爆料，籃網有望突圍，仲打算將艾榮及杜蘭特一同收歸旗下！處於重建嘅籃網今季表現令人眼前一亮，日前送走後衞卡拉比後，球隊已有足夠薪酬空間簽入2位頂薪巨星。據權威記者Wojnarowski透露，塞爾特人控衞艾榮正慎重考慮加盟籃網，籃網更希望以簽入艾榮作為球會爭標雄心嘅證據，吸引杜蘭特來投。