買樓比賽打官司李安納忙到暈
多倫多速龍歷史性殺入NBA總決賽，未計今日早上進行嘅Game3，目前同勇士打成1比1平手。速龍能夠創造歷史，今季來投嘅李安納無疑係核心人物，但由於呢位冷面殺手季後將回復自由身，盛傳佢一心想轉往洛杉磯發展，搞到速龍球迷好擔心。不過日前出現振奮消息，有傳媒記者爆料，李安納近日喺多倫多置業，意味佢好可能決定繼續留喺速龍。（Game 3周四早上9時開賽，體通天下及Viu TV直播）
除咗買屋呢個「留隊信號」之外，有知情人士透露，6月底28歲生日嘅李安納正考慮同速龍簽訂一份為期1至2年嘅短期合約，原因係速龍目前人腳配搭已經好完整，短期續約可以確保佢未來1至2年，有充足團戰實力繼續衝擊總冠軍，反觀「洛杉磯雙雄」湖人同快艇依家仍然喺重整期，李安納大可等多一段時間先過檔。
想搶回「大手板」個人標誌
除咗備戰總決賽同買樓之外，其實李安納仲要應付一場官司；據報李安納喺2011年成為NBA新人，當年得到贊助商Jordan Brand睇中簽約，並參與設計個人代表Logo。該Logo設計靈感來自李安納著名的一雙大手板，並以其名字簡寫融入當中。據李安納的代表律師表示，該「大手板」設計要先得到李安納同意先可以出現喺部分商品當中，但如今李安納轉投另一贊助商New Balance，卻發現「大手板」標誌已被Nike註冊，因此李安納決定打官司索回註冊標誌。