李安納家姐直播搞寸Party
速龍實現東岸冠軍美夢後，成個加拿大嘅球迷沉醉喺一片喜悅之中，王牌球星李安納更加被當神咁拜，不過喺呢個開心時刻，李安納姐姐Miesha玩IG直播就「出事」，因為喺直播期間，背景突然出現一把男聲話：「係人都知，佢（李安納）下季一定唔會喺呢度（速龍）！」粉絲聽到真係一盤冷水照頭淋！
呢段片引嚟速龍球迷好大反應，有球迷估計把聲係來自李安納嘅舅父；據聞李安納上季要求離開馬刺，呢位非常舅父就扮演轉會主導角色，十足金牌經理人。知道段片出事，Miesha事後迅速刪除影片，仲話以後都唔敢再玩直播，同時Miesha解釋把男聲只係身邊啲「口臭朋友」亂咁講，真係信不信由你。唔少球迷都喺外國網站討論區留言，有粉絲嗌一早預咗李安納會離隊，不過呢個時候講就掃興啲囉！大部分網友就話咪理咁多，依家最重要係打好總決賽，砌低西岸勁旅勇士先再打算。
下一站鎖定洛城球隊
事實上速龍高層都心裏有數，上季送走王牌迪羅辛換入李安納，目標都係博一鋪希望嘗得總冠軍滋味，若然最終結果係「人獎兩空」，大有可能要再次步入漫長嘅「儲彈藥期」，等待另一次衝冠機會。李安納今季之後將會回復自由球員，盛傳佢上季開始一直希望去洛杉磯落班，所以估計好大機會簽約湖人或者快艇，且看速龍夠唔夠牙力、如何出盡法寶留低呢位超級巨星。