「藍鳥」傑志失落聯賽錦標，若然今午贏得足總盃，仍可取得來季亞洲賽資格，隊長黃洋坦言不容有失：「一間好嘅球會係需要有關注度，踢亞洲賽無論喺本地定亞洲，都會獲得球迷注視，球會如果想長遠發展，就要Keep住出現喺高水準比賽。」門將王振鵬今仗需作壁上觀，黃洋稱另一門將郭劍橋經驗豐富，能助球隊爭標，「大哥」還笑言：「『阿鵬』提早放假，佢輕鬆過我哋，所以我哋唔使為佢爭呢個錦標，球員係要為自己、為球會發展去爭勝。」
今季為冠忠南區射入11球，日前當選今屆足球明星的華人首席射手夏志明表示：「呢個可能係我哋冠忠南區創會以嚟第一個冠軍，對我哋好重要，我認為今場係戰爭而唔係比賽！」
今仗倒戈鬥舊東家的「子彈」續稱：「無論對咩對手，我哋都係以冠軍為目標，但係嚟到球場熱身，見番『朱Sir』、黃洋，呢啲以前嘅教練、舊隊友，見到好多離離合合、散散聚聚，但一切我都覺得係開心嘅事，咁多年後都可以見到大家唔同方面嘅成長。」