隨陳曉明投理文即有盃捧 蔡振賢識操又識補
「90分鐘後重新上力！」理文副隊長顏樂楓說。理文在菁英盃與佳聯元朗激戰120分鐘，終贏波捧走球會歷史上首個錦標，賽後理文球員紛紛在社交平台答謝體能教練蔡振賢，令他們戰至加時依然有氣有力！今季跟隨恩師陳曉明由夢想FC轉投理文的「蔡振」，坦言球員想提升體能，狂操猛練未必最有效，從生活着手、學懂補充才是關鍵！
「作為體能教練，最重要係幫球員提升表現同減少受傷！」蔡振賢說明自己的職能。每個球季，球員均需應付超過20場比賽，如何協助他們維持體能應付這場「持久戰」實屬一個讓人煩惱不已的課題，「蔡振」稱事前計劃固然重要，但更相信要「重質不重量」︰「足球需要嘅體能分好多唔同方面——爆發力、靈活性、速度、耐力等等，有唔少教練一講到體能，就係要做好多嘢令到球員好辛苦，但其實佢哋誤解咗，令到球員唔止冇進步，甚至好容易受傷。」
面對「土地問題」要從生活着手
在香港發展體育事業，「土地問題」已成為常態，「蔡振」坦言只能從側面着手：「香港好少球會擁有自己嘅會所、宿舍可以安排飲食、接送畀球員，變相令呢啲細節好難執行。所以我會提供一個方向，畀佢哋去學識喺自己生活上着手。」從日常操練中所見，球員在訓練完畢後都會飲用蛋白飲料，「蔡振」強調：「補充品對運動員表現有額外幫助，特別係好多同足球營養有關嘅嘢，佢哋都未食得夠嘅時候，呢點係更加重要。」
已是第二季征戰港超聯的「蔡振」雖大獲好評，但他未有自滿：「始終我教練生涯都係啱啱開始，好多嘢都仲未掌握得好好，特別係『教』呢方面。教學上最大困難係執行，好多嘢你計劃好晒點樣做，但係實際情況隨時變，你就要不停去根據實際情況去調整，然後再用好多唔同嘅方式去表達出嚟。」
來港追夢多得女友體諒
「蔡振」在投身港超聯前，在澳門一所小學任職體育老師，兼執教澳門U16代表隊。為了發展自己的夢想，他放棄「穩定」，也犧牲了與家人、朋友的相聚時光。一路走來，他不但感激家人支持，還有女朋友的體諒：「佢好支持我，我其實可以做好多唔同工作，但我揀咗嚟呢度（香港），犧牲好多嘢，佢都冇介意，呢樣係我最想去多謝佢嘅地方。」兩口子大部分時間分隔兩地，問及如何維繫感情時，「蔡振」指：「維繫就係……都要靠大家付出，有時我搵吓佢，有時就佢搵吓我，睇我哋比賽，始終澳門同香港唔係隔太遠，大家搵對方都比較容易，所以問題都唔太大。」
圖/文：陳焌鏗