剛過去的周日誕生今季英超冠軍，曼城成功衞冕，亦係主帥哥迪奧拿個人近10年嚟第8個聯賽冠軍。以成績嚟講，呢位西班牙名帥絕對係一個非常成功嘅領隊。
至於利物浦雖然喺最後一場賽事勝出，但最終只能屈居第二，同冠軍擦身而過，絕對係有啲遺憾。但我覺得利物浦今季已經打出咗自己嘅風格，高普喺呢幾年辛苦建立出嚟嘅足球體系，亦得到外間高度認同及讚賞。雖然佢執教紅軍4年入面，暫時仲未得過任何冠軍，但無可否認，佢都係一位非常成功嘅領隊。
所以話「即時成績」定「建立球隊」重要呢？球迷當然會話最好兩者兼得啦！但現實係咪真係咁容易做得到呢？要同時做到呢兩樣嘢，絕對要有好多嘢配合到，包括資源同時間。就好似今年港超嘅情況一樣，多咗球隊願意投放資源，增強本身球隊嘅實力，令到整個聯賽競爭力大大提升，爭冠情況亦刺激咗好多。足球係需要長時間嘅發展，所以無論係球隊老闆、贊助商、教練、球員以至球迷，絕對係缺一不可，希望大家都可以共同努力，為香港足球爭氣。
富力R&F主教練 楊正光