咖喱炒粉火箭舔番場
上場拚至左手中指甩臼嘅史堤芬居里球場上變身大廚，關鍵時刻連整兩碟「咖喱炒粉」，搞到勇士喺昨晨進行嘅NBA季後賽西岸4強，作客拚至加時以121比126不敵火箭，猶幸勇士於7場4勝制系列賽，仍以場數2比1領先，Game4周二早上繼續喺休斯敦火箭主場舉行。
追分時刻入樽衰咗
兩軍主力賽前都有傷，之前被插爆眼嘅火前球星占士夏登似乎影響冇咁大，今場手風然依大順全場攻入41分、9個籃板及6次助攻，反觀勇士球星「咖喱仔」史堤芬居里就嚴重失準，全場23次起手只中7球，連罰球都係得3射1中，效率極低。最大鑊係打到加時階段，史堤芬居里走籃甩轆，去到最後19秒落後5分，一次精彩突破後可以輕鬆上籃，點知「咖喱仔」失驚無神學人玩入樽，結果跳得唔夠高衰咗，睇到球迷O晒嘴，最終連呢2分都攞唔到，畀網民笑到飛起之餘，仲注定勇士翻盤無望，就算隊友「KD」杜蘭特射入全場最高46分，勇士依然難逃輸波命運。
火箭搶番關鍵勝仗，除咗占士夏登發揮出色之外，隊友艾歷哥頓亦重拾射手本色，今場射入7個三分球為火箭攻入30分。