拓荒者掘金幾乎打交

NBA季後賽，西岸4強金塊同拓荒者昨日上演火藥味濃嘅激戰，兩隊皆有球員先後打到爆鼻見紅，完場前更發生衝突，最終作客嘅拓荒者以97比90勝出，7場4勝制賽事追成1比1。今季表現神勇嘅金塊主力祖傑，今仗射入16分及搶下14個籃板做出「雙雙」，可惜無助球隊再下一城，反而主動權落在拓荒者手上，6人取得雙位得分成為取勝關鍵。不過今仗兩隊打法極為硬朗，受傷鏡頭不絕，其中上半場已被打爆鼻嘅金塊球員克雷格，完場前45秒再一次被同樣爆鼻嘅拓荒者中鋒簡達撞至倒地，旋即爆發衝突，幸好雙方職員及時制止，避免群毆場面出現。