大埔人李家豪只因一個夢
「自己係大埔人，代表大埔區，個感覺真係好正！就有啲似代表香港隊出賽，會有歸屬感！着住大埔波衫比賽，覺得自己嘅能量增加咗！」自小已在大埔富亨邨街場留下不少腳毛的李家豪，曾因捲入官司無法踏足綠茵場，闊別職業足球兩季後，他希望能夠實現兒時夢想——跟兄弟們合力爭取頂級聯賽冠軍！
今季是李家豪球員生涯最多上陣機會的一季，然而近兩年因受官司影響，致足球事業出現真空期，對他的考驗遠比在球場上的挑戰大︰「當時冇波踢個人真係好迷失，自己最鍾意做嘅事突然冇得做，嗰段時間真係好難捱，試過出去做嘢都唔會提得起勁，一路諗住足球。」
「大家一齊攞聯賽冠軍」
能夠令「家豪」急起直追彌補失去的兩年，除了對足球的情意結，更重要是一個兒時夢想︰「我記得有次真係好頂唔順，跟住打畀『堅Sir』，我同佢講唔知單官司最後結果係點，但即使我冇得踢番波都好，我記得我哋細個嘅夢想，就係大家一齊攞聯賽冠軍，就算我踢唔到，都想返嚟大埔幫手做其他嘢，同個團隊去實現我哋嘅夢想。『堅Sir』當時好愕然但好開心，話畀我講到好感動，其實我嗰一刻太唔開心。老套啲講就係有時啲嘢，真係要冇咗先識得去珍惜！」
和富大埔主帥李志堅經常被外界稱為「堅爸」，正正因為他對球員就如親生仔看待，「家豪」亦感激恩師在場內場外對他的支持和教導︰「『堅Sir』當初要簽我，真係唔係咁簡單，實會有好多說話聽，我知佢用咗自己嘅人格幫我做擔保，所以今季可以有咁嘅表現畀球迷睇，『堅Sir』功勞好大，佢成日搵我傾計，見我鬆懈咗又會督促同心理輔導我。」
「第一日跟操毛管戙到想喊」
「家豪」續道︰「好記得第一日跟操，行入去廣福球場個感覺係勁想喊，有種毛管戙嘅感覺！當時感覺同隊友差距好大，會諗自己停咗兩年，點解同佢哋爭咁多？不過都自知返到嚟會面對呢啲情況，自己心態應該更加珍惜同着緊。」
談到「家豪」身邊好兄弟，不得不提與他在球場上合作防守，球場外則同樣住在富亨邨的「雙重鄰居」馮慶燁︰「我讀小學已經識『燁仔』，同佢同一間學校，大家好早一齊踢足球隊，一齊跟『堅Sir』踢『幼苗』。其實佢由細到大都好聰明，亦都好了解我，佢知道我自律性同集中力唔高，成日都會Push我，喺球場上大家會互相提點，研究防守點樣可以做好啲，我諗自己嚟到大埔有咁嘅表現，『燁仔』都有唔少功勞！」
圖／文：何彥霆