「字母哥」慘做綠軍入樽布景板
NBA季後賽次圈陸續開打，昨晨兩場大戰中，最令人意外係常規賽聯盟最好成績嘅公鹿，次圈首回合主場竟以90比112不敵塞爾特人。被視為常規賽MVP大熱嘅「字母哥」安迪杜甘普今場表現大跌Watt，喺「綠軍」嘅嚴密防守下處處受制，全場21投7中僅得22分，「字母哥」如果諗唔到方法提升自己，公鹿季後賽隨時玩完呀！
公鹿次圈出閘脫腳
塞爾特人今場明顯對安迪杜甘普有針對性部署，盡量減少喺內線接波，同時三人聯防阻止佢上籃。「字母哥」唔止成為對手入樽嘅布景板，仲要打到第2節先正式投籃得手，「綠軍」今場贏到，功臣肯定係畀到安迪杜甘普極大麻煩嘅荷福特。今場交出20分、11籃板嘅荷福特賽後話：「我哋一直將注意力擺晒落去安迪杜甘普，要佢每次攞波打都咁辛苦，不斷畀壓力佢，我哋做得相當唔錯。」
另邊廂，西岸4強就有勇士主場大戰火箭，狀態大勇嘅勇士前鋒杜蘭特（KD），今場又有35分進帳，帶領勇士贏104比100。主帥卡爾賽後大讚KD係全球技術最全面同出色嘅籃球員，認為冇人阻擋到佢，甚至將KD媲美佢前隊友、「波神」米高佐敦。即使今場「浪花兄弟」受傷患問題困擾，史堤芬居里只得18分、7籃板同4助攻，奇利湯臣更因扭傷右腳足踝只得13分，KD一樣撐得起勇士。
周二賽程
8:00am 速 龍 Vs 76人
10:30am 金 塊 Vs 拓荒者
周三賽程
8:00am 公 鹿 Vs 塞爾特人
10:30am 勇 士 Vs 火 箭
昨日戰果
公 鹿 90:112 塞爾特人
勇 士 104:100 火 箭
前者主場；資料只供參考