馬刺發夢金塊過關
NBA季後賽昨上演西岸首圈生死「搶7大戰」，金塊主場以90比86力克馬刺，總場數贏4比3晉級4強，將會同拓荒者爭奪西岸決賽資格。今場雙方鬥得非常激烈，金塊喺第3節一度試過領先17分，但馬刺喺最後52秒一度追至落後2分，不過喺關鍵時刻佢哋竟然犯上「小學雞」錯誤，最終「自殺式」輸波出局。
普帥「柯打」球員「撞聾」
金塊中鋒祖傑今場繼續MVP級演出，交出21分、15個籃板同10次助攻嘅「三雙」成績；金塊第3節中段曾領先67比50，不過馬刺喺老將基爾準繩外投追分下進行大反擊，去到比賽尚餘52.2秒更追至86比88。及後金塊控衞梅利切入上籃建功，再拉開4分，而馬刺主將迪羅臣反攻被封走，當時比賽剩餘不足26秒。
正常情況下，馬刺至少要有2次球權先可以追番上嚟，戰術上故意犯規送對手上罰球線，連小學生都識。但無論馬刺教練普波維治喺場邊高呼「犯規」，甚至走入場區大叫，成班馬刺球員竟然毫無反應，任由金塊幾乎花盡24秒進攻時間，喺後場搶回籃板嘅馬刺僅餘4.9秒進攻時間，今個系列賽之前6場打得咁辛苦，如今竟以極低級嘅「自殺式」輸波出局。
據報普波維治當時係叫艾迪列治送祖傑上罰球線，不過由於主場球迷聲浪太嘈，艾迪列治完全冇為意教練指示，但唔少球迷就唔Buy呢個講法，認為以馬刺咁豐富嘅季後賽經驗，嗰一刻唔講都知要犯規，有網民仲話普波維治可能會被激到提前退休！