護級失敗凱景去留未定

對於今季成績，馮Sir直言不如預期︰「始終資金有限，畀唔到出好好嘅待遇，尤其是外援，令呢方面我哋同其他球隊有差距。喺季中借咗域陀、許嘉樂同羅拔，實力明顯提升咗，但始終我哋有經驗嘅球員唔多，所以好多時候喺比賽時，佢哋都好容易犯一啲毛病，犯咗一啲唔應該犯嘅錯而導致失波或輸波。」

把握力穩定性不足最致命

馮Sir續道︰「我哋預咗畀啲年青球員去比賽同吸收經驗，亦都預咗佢哋會犯錯，會長同老闆佢哋都了解呢個情況，其實大家都有盡咗力，只不過去到一啲關鍵嘅比賽，好多時埋門把握力不足，令到比賽發揮同穩定性唔夠，呢樣嘢係球隊今季嘅一個弱項。」

問到凱景的前途，馮凱文表示仍未有定案︰「始終要同會長勞景祐、老闆佢哋坐低慢慢傾清楚，都要睇吓佢哋點睇，如果申請到留級，但最後好似今年咁樣，咁就冇意思。」他又指餘下2場都會派遣經驗較少及非借用的球員上陣，讓他們爭取表現，博取其他球會的青睞。