NBA昨晨上演4場季後賽大戰，焦點落喺火箭作客爵士場波，之前已經連贏兩場嘅火箭，首席球星占士夏登今場初段嚴重失準，頭15次投射全炒。好在佢憑住超強耐力，喺關鍵第4節最後兩分鐘突然回勇連攞7分，最終以104比101險勝，將總場數改寫成3比0，晉級在望。
「大鬍子」夏登今場投射發揮超恐怖，除咗頭15射全炒，全場都只係20射3中，好彩佢喺罰球線依然有穩定發揮，16射14中，結果全場都交出22分10助攻同4籃板，當中佢22分之中有14分喺最後一節取得，關鍵時刻始終有貨交，成為贏波功臣。
早前夏登個私人教練羅蘭德受訪，就透露咗夏登嘅後撤步3分波關鍵，話係佢用單手持球先做小撤步，然後再單手持球後退多步，因此佢會令對手更難防範。羅蘭德仲爆出夏登腳力驚人，每日都會加操力量訓練1粒鐘，同時又會喺唔同位置加操三分波，每日至少射多100球，總之就係天才加勤力結合，先可以維持喺關鍵第4節表現永冇跌Watt咁話啦！
講番場波，火箭另一位主將基斯保羅，今場都交出咗18分4籃板4助攻同3偷波，成為頭3節撐起火箭嘅關鍵人物。至於爵士主將米切爾雖然貢獻34分，但同夏登一樣都係投射命中率差，僅27投9中，包括末段射失3分波，致令球隊始終追唔番。
同日賽事，活塞有格芬復出，但依然以103比119不敵公鹿，場數輸到0比3。至於金塊就成功追和馬刺場數2比2，形勢緊湊。