李安納食牛鞭速龍即W
食牛鞭，係勁啲！周三進行嘅NBA季後賽，速龍主場憑賽前食咗牛鞭嘅李安納啟動「季後賽Mode」，轟入全場最高37分，加上喺Game1大戰7次起手全炒嘅路維反彈，交出22分同7次助攻，主場以111比82大破魔術，總場數追成1比1平手。
速龍大戰魔術之前，陣中球星伊巴卡嘅最新一集Youtube節目《How Hungry Are You？》，專誠請咗隊友李安納嚟試食佢嘅菜式——牛鞭Pizza！李安納望住個Pizza賣相已經耍手擰頭，但伊巴卡不斷遊說話有「有豐富蛋白質」，結果氹到李安納試食呢款「大補品」，隨即場上大爆發。
西岸戰線方面，金塊憑主將祖傑攻入21分、13個籃板同8次助攻，主場114比105擊敗馬刺，總場數追成1比1；另一仗拓荒者喺主場以114比94再一次擊敗雷霆，總場數領先到2比0。