古辛斯重創快艇反勝勇士
勇士大鑊了！周二上演嘅NBA西岸季後賽，勇士喺一度領先31分嘅大好形勢下，被作客嘅快艇大逆轉，最終勇士主場以131比135輸波，7場4勝賽制下，總比數被追成1比1不特止，球星中鋒古辛斯更不慎受傷，將面臨數月休養，意味成個季後賽都唔使預佢。
古辛斯喺第1節一次飛身救波嗰陣左腳受傷，佢雖然可以自己起身，但隨即離場返更衣室接受治療，網上流傳一張古辛斯離場途中相片，見佢左腳嚴重腫起。《ESPN》消息指隊醫懷疑古辛斯股四頭肌撕裂，但要經MRI檢查先至可以確定。如果證實真係撕裂，古辛斯將會休戰幾個月。
雖然古辛斯傷出，但勇士今場表現一直對辦，上半場完結拋離快艇23分，打到第3節更一度拉開到全場最多嘅31分差距，不過快艇亦係呢個時候突然發力作出瘋狂反撲，球星路爾斯威廉斯轟入36分並交出11次助攻，隊友加連拿利同夏利爾分別攻入24分同25分。隨住完場前10秒，「咖喱仔」史堤芬居里三分起手唔中，最終快艇翻盤成功，作客打爆勇士。