「字母哥」打出MVP風範 公鹿鎖定常規賽No.1！
尋日NBA常規賽東岸重頭戲，公鹿作客以128比122擊敗76人，喺只餘3輪情況下，成功以59勝20負鎖定聯盟常規賽「1哥」位置。呢支上季東岸第7位、季後賽首圈拜拜嘅球隊，今季成績大躍進，有賴王牌安迪杜甘普步入「球王」境界，「字母哥」今場就用近乎完美嘅表現，KO另一MVP熱門艾賓特，稱得上係全NBA最強！
同場Block爆76人艾賓特
公鹿今場開波唔夠3分鐘，就有控衞比迪素用波掟對手艾賓特被逐，好在「字母哥」安迪杜甘普打出身價，全場怒轟45分，仲交出13個籃板、6次助攻同5次封阻，演出更勝食「大三元」嘅76人主將艾賓特（34分、13籃板、13助攻）。值得留意安迪杜甘保今場5次封波，其中4次就係「Block」死艾賓特，可以話係「超級怪物」剋制「怪物」！
公鹿贏波後鎖定聯盟常規賽1哥之位，季後賽確保有主場優勢。陣中除「字母哥」外，其餘戰將都屬實而不華球員，但走埋一齊偏偏產生強大化學作用，打出「頂級嘅進攻」同「精英級嘅防守」，令公鹿成為今季總冠軍熱門。