on.cc東網2:30pm直播 夢想FC攔路智鬥富力R&F
「中銀人壽香港超級聯賽」今午假青衣運動場上演獨腳戲，夢想FC火併富力R&F。暫排聯賽第4位的富力R&F，比多踢1場的榜首傑志少3分，今仗勢必力爭勝仗保住爭標機會，撞正主帥梁志榮揚言諗計盡搶每一分的夢想FC，相信激戰可期。（東網on.cc周六下午2時30分直播）
夢想FC上周於足總盃8強對和富大埔，憑着拿祖加時建功，最終激戰120分鐘後淘汰「綠戰士」出局，主教練梁志榮雖對球隊能夠進身4強感高興，但認為球員在一些細節上可以做得更好︰「其實我哋教練團覺得已經做足部署，但用波方面只係得頭10分鐘比較暢順，因為入咗波之後，班球員驚輸就出多咗長波，所以球隊之後喺搶波同用短傳嘅時間都短咗。」
「細榮」亦表示，球隊目前在聯賽護級壓力不大，期望球員能夠在寬鬆的環境下有良好發揮︰「富力目前喺聯賽爭標形勢比較緊張，壓力會喺佢哋度，基本上，我哋都冇太大壓力，當然我哋喺聯賽都會盡力去搶每一分。」至於傷患方面，防中馬高斯上仗腳踝有輕微扭傷，今仗上陣成疑。
光Sir信心爆燈
近兩場聯賽持續失分的富力R&F，先後作客賽和冠忠南區及主場不敵傑志後，上仗出戰足總盃再遇冠忠南區亦以1球見負，不過主教練楊正光認為球員表現稱職︰「上場表現整體而言非常好，都做到賽前部署，攻守上亦都稱職，表現有90分。球隊未能把握機會入波，到最後只係一個失誤就畀對手取得入球，係有啲可惜。」
「光Sir」認為，今仗雖不易應付，但對球隊充滿信心︰「夢想最近嘅狀態同表現都好好，打入咗兩個盃賽4強，感覺上佢哋呢兩季冇乜大變動，由一班有經驗嘅球員帶領住年輕球員，一班小將都開始成熟。以往佢哋嘅打法都好貫徹用波，堅持呢個踢法，加上心理包袱都唔太大，所以今場波對我哋嚟講會難踢，但唔影響我哋一班球員爭勝嘅信心。」人腳方面，首循環對賽轟入2粒、協助球隊大勝6比0的基奧雲尼料會正選披甲，上仗因傷退下火線的富力中場伊達，目前仍受肌肉勞損的問題困擾，相信今仗會掛免戰牌。
