屠俊翹繼續拚最好嘅仲未到

自2012年出道起，「阿翹」的球員生涯並不如意，總是徘徊在正選與後備之間。縱然他在2015/16球季曾奪得「最佳撲救」獎項，但網上批評的聲音總比讚美多，面對眾多評論，「阿翹」認為對自己交代更為重要：「最初踢嗰陣，係會受評論影響，踢多一、兩年，人哋講咩都唔會傷害到我。始終人哋唔會明白你心態同情況，所以只要相信自己做緊嘅嘢就得。把口喺人哋度，你踢得職業就唔係踢波咁簡單，要面對球迷嘅評論等等。」

唔理批評只同自己交代

他續道：「我每場有自己嘅要求，外間講咩都唔會理，只要你知自己嘅情況，聽番教練畀你嘅意見，慢慢一步一步進步就得。就算你可以一步登天，我只會覺得你好彩，但係運氣呢啲嘢我唔相信，我只相信實力，你係得就得，唔得咪學習，所以我唔會理外間嘅評論。」

「終身學習」，這四字無論在人生哪個階段都適用。與香港大部分球員一樣，「阿翹」間中會到球場教導學生，他直言樂在其中：「其實都享受嘅，我有教年紀大嘅球員，又有教小朋友，有啲教練以鬧為主，但我就唔會。我會諗番起自己以前細個面對嘅嘢，我本身遲起步，依家教嘅小朋友比我早起步，我會更加用心去教，因為我明白佢哋嘅情況。至於教年紀大啲嘅球員，我嘅教法就會偏向速成，始終年紀大，吸收能力冇小朋友咁好，所以希望佢哋得到成功感為主。」

「你教學生，學生教你」

教導的同時，「阿翹」也能從中學習：「有時我遇着啲學員，可能佢哋有某方面叻過我，反而會令你諗：『咦，可能咁樣都得喎！』大家好似互相學習咁，視野大啲，你亦自然會明白更多嘢。」

難忘踏足日本西班牙 阿翹：足球，幫我夢想成真

數碼暴龍、多啦A夢、踢出我天地等卡通片，陪伴不少大男孩度過童年時光，成為腦海裏永不磨滅的記憶。這一切，還令屠俊翹愛上日本文化，當年隨橫濱FC（香港）到橫濱集訓的「阿翹」，坦言首次踏足日本的感覺，恍如夢想成真。

讚三浦知良認真唔Hea踢

「阿翹」說：「以前細個覺得日本好遙遠，只可以透過電視去見識。其實嗰陣諗都冇諗過去日本，去到嗰陣感覺好驚訝，因為唔再係幻想，係真實喺你面前。講到最深刻，就係同橫濱FC一隊踢友誼賽，對三浦知良真係畢生難忘，話晒佢都係健力士世界紀錄保持者。佢雖然年紀大，但絕對唔會Hea踢！」

效力傑志青年軍期間曾隨隊到西班牙參與地中海盃的他表示：「細個睇卡通就鍾意日本，睇波就鍾意睇西班牙，好好彩未到20歲就已經達成去呢兩個地方嘅願望。」

屠俊翹Profile

出生日期：1994年7月17日

身高：1米80

體重：78公斤

位置：守門員

球衣號碼：17

曾效力球隊：深水埗、橫濱FC（香港）、YFC澳滌、夢想駿其、香港飛馬

現效力球隊：夢想FC

圖/文：陳焌鏗

（部分相片由受訪者提供）