湖人「大帝」勒邦占士（黃衫）拳難敵四手，周日領軍主場迎戰塞爾特人，結果喺賽前收到壞消息，繼古斯馬受傷休戰後，恩格林更因為被驗出右肩出現深靜脈血栓情況，今季已經提早收咧。至於新星波爾足踝受傷，亦有可能今季無緣再上陣，最終湖人以107比120落敗，連輸5場。主帥禾頓對季後賽唔抱希望，宣布會以占士健康為考慮，限制「大帝」上陣時間，不過呢位球星今仗依然有高效發揮，上陣28分鐘攞到30分、10個籃板同12次助攻，惜未能為湖人起死回生。
