珍惜職業球員生涯每一日
喺香港呢個地方生活將近30年，短短30年，世界的確轉變得好快。作為一個足球員，個人認為可以用自己興趣去成為職業，絕對係件幸福嘅事，最起碼每日都做緊值得高興嘅一件事。
光陰似箭，時間過得非常快，運動員生涯嘅壽命有限，我好珍惜每日嘅訓練，尤其係我上季初好唔好彩受咗一次重傷。當時我同每一個運動員受傷之後嘅感受一樣，都係非常失落，咩都做唔到，淨係得個等字，就好似喺度虛度緊光陰咁……
所以依家每日無論有幾辛苦、有幾曬、有幾熱、跑幾多，我都好享受！因為呢種感覺好充實。經過咗呢10幾年職業球員生涯，亦到過唔少地方比賽，希望嚟緊自己可以利用過往嘅經驗，幫助身邊嘅年輕球員，令佢哋成長。同時，自己會喺僅餘嘅運動員生涯，繼續向未完成嘅目標進發。最後想喺度衷心感謝每一位支持過我，同畀過機會我嘅人，謝謝。
專欄輪住嚟
香港飛馬球員 曾至孝