湖人輸到傻大帝發爛渣
NBA昨日常規賽，湖人「大帝」勒邦占士經歷恥辱性一幕，近況差勁嘅湖人作客聯盟成績包尾球隊太陽，雖然有勒邦占士交出27分、9籃板同16次助攻「靚仔」數據，但湖人仍以109比118落敗，離季後賽資格已經愈嚟愈遠。
當比賽去到第3節中段，湖人已經大比數落後，當勒邦占士準備底線開波嗰陣，竟然將個波直接掟向己方籃板後面反彈出界，炮製NBA史上最低級Turnover，唔少球迷質疑勒邦占士係知道自己出戰季後賽嘅紀錄即將斷纜，所以忍唔住發爛渣故意「自殺」。
湖人依家落後西岸第8位嘅快艇5場勝仗，最大問題係佢哋自己狀態極差，近8場賽事輸6場，今場連對住墊底嘅太陽都輸波，要後上殺入季後賽除非有奇迹啦！