尋日NBA常規賽勇士作客121比110擊敗黃蜂，中鋒古辛斯打出加盟後嘅代表作，交出24分同11個籃板「雙雙」數據，令勇士唔使連敗。古辛斯今場除展示佢內線統治力外，亦表現出佢「食T」（被罰技術犯規）嘅「本領」。第4節中段黃蜂球員林比進攻時被踩甩鞋，但係攻勢進行緊大家冇理到，點知古辛斯執起隻鞋隨手「飛」向場邊，梗係畀球證吹佢技術犯規，古辛斯就相當勞嘈。
事實上古辛斯「臭名遠播」，今季打咗14場波拎到6個T-Foul，勁在連季初養傷時，都試過喺場邊「食T」被逐。不過唔少球迷今次就撐古辛斯，話佢掟鞋出場只係唔想有人踩到而「拗柴」，古辛斯掟走隻鞋後亦專注防守，無做任何挑釁動作，今次被罰只係個「朵」累事。