紐約人爆冷拔刺上埋奧斯卡

主場18連敗止血

迪羅辛雖然為馬刺攻入全場最高嘅32分及9個籃板，但整隊表現一般，反觀賽前主場18連敗嘅紐約人知耻近乎勇，喺球迷面前打出爭氣一仗，眾將極為搏命，小將多特森攻入8個三分球獲27分，史密斯就有「雙雙」19分、13次助攻同6個籃板，連同替補球員共有6人達雙位數字進帳，成功結束主場連敗頹勢。

紐約人主場贏波咁爆，連影壇盛事奧斯卡都拎嚟做話題。尋日頒獎嘉賓森姆積遜即場報喜，喺公布得獎名單前，向台下嘅著名導演兼紐約人忠實粉絲史碧奇李話：「主場連輸18場之後，今日紐約人贏波喇，我再講多次，紐約人贏咗喇！130比118贏馬刺呀！」全場報以笑聲及掌聲，相當搞笑。

同日西岸「2哥」金塊主場鬥快艇，主隊憑中鋒祖傑及米沙比兩人錄得「雙雙」數據，喺全隊有6人得分「上雙」下，以123比96輕取快艇，金塊4連勝後繼續追貼西岸榜首勇士。