凱景迎夢想FC護級打崩頭
今日港超頭場榜尾凱景於主場深水埗運動場迎戰「尾3」夢想FC，雙方賽前僅差5分，今仗護級關鍵3分花落誰家，值得球迷期待！
（周日下午2時30分開賽）
馮凱文：要減少犯錯失波
目前護級形勢水深火熱的凱景，近期表現已見進步，上仗不敵飛馬一役共錄得18次攻門，惟沒有命中目標埋門，主教練馮凱文強調需要改善︰「近幾場我哋都係輸喺埋門能力度，好似上場波球隊其實唔差。夢想喺我心目中唔易應付，兼且佢哋近況回勇，我哋練習時都再三提醒球員要集中，唔好又因大意犯錯而導致失波，我哋喺落後情況下較難去應付，所以首要做好防守。」
夢想FC上仗主場大勝佳聯元朗，主教練梁志榮自感滿意︰「上場球隊喺針對性方面做得好好，總括而言表現就係好。」「細榮」續稱今仗壓力較低，期望球員能放下包袱盡情表現︰「其實球隊每一課練波，都好講求傳波同幫波嘅質素，球員由季初到依家喺呢方面都進步咗好多，但當然要再去加強。今場對凱景只要攞到分就好穩陣，始終個壓力唔喺我哋身上，希望踢得放啲，好多嘢都唔使咁拘謹。」