李啓智借Cue學做中場
許多足球員在綠茵場外，也會玩衝撞較少的運動，例如C朗拿度和尹佩斯是乒乓球高手。效力凱景的小將李啓智也不例外，閒時就最愛「篤波」打桌球。「阿智」稱打桌球講求機靈，要視乎哪邊的方向較有利取分，培養出來的專注力，對身為中場的他，在思考和觀察方面甚有幫助！
小時候受表哥薰陶而愛上桌球的李啓智，培養了打桌球的習慣也有4至5年之久，雖然只屬玩票性質，亦沒有參加過任何比賽，不過受訪當日跟「球齡」相近的守門員教練董浩然比併亦有板有眼，多次能一Cue打出30多度，亦不時「Set士碌架」防守。
情緒唔穩只會愈踢愈弊
儘管桌球是個人運動，但「阿智」認為培養出來的專注力，也可以運用到足球場上︰「桌球入波嘅方式好多，6個洞都係目標，要觀察嘅嘢有好多。踢中場亦要環顧四周，攻守兼備。桌球需要好高嘅心理質素同穩定嘅情緒，若然起伏不定，呢一吓個波打唔入，就會影響到下一步；踢波一樣，情緒打亂咗就好難專注，只會愈踢愈弊。思路清晰對任何運動都極為重要，交失咗一球，調整過後就希望下次做得更好。」
上季效力理文的「阿智」，因長期養傷影響上陣機會，今季來到凱景落場時間儘管未算大幅提升，但至少披甲場合也不再局限於菁英盃，「阿智」期望能爭取更多機會︰「舊年主要踢菁英盃，壓力唔大，但今季加盟凱景，球隊成績唔算太理想，所以起初都好緊張，信心不足影響咗表現；依家下半季開始咗，多咗新外援增強實力，每次走上球場我都會好拚搏付出百二分嘅努力，希望球迷睇到我哋年輕球員都好用心同有一定實力。」
向偶像沙比偷師克服困難
現於中大修讀體育科學與健康兩年制學位課程的「阿智」，深明要兼顧學業及足球事業非易事，但他揚言沒有後悔，並以偶像世界「1哥」沙比來激勵自己︰「我讀緊個課程今年係第一年，雖然有時練完波就要趕上堂，的確好辛苦，亦都早知道呢條路唔容易行，但條路自己揀，唔會輕易放棄。沙比係我最欣賞嘅桌球手，有實力之餘最重要係佢個心態好好，就算比賽落後緊，都有強大嘅心理質素去反勝對手。我希望自己都可以從佢身上學習，到遇上逆境或者感到唔如意時，可以調整自己心態，去克服難題！」
圖、文：何彥霆