三巨頭包辦93分勇士滅火
勇士昨日喺NBA常規賽主場以120比118撲熄熱火，陣中「三巨頭」史堤芬居里、杜蘭特同奇利湯臣發威，合力攻入93分，得分能力超屈機，其中奇利湯臣仲玩埋「自己助攻畀自己」添，似乎喺呢個地球上已經冇球隊阻止到佢哋！
今仗「咖喱仔」史堤芬居里有25分，而杜蘭特有39分、6個籃板同4次助攻，當中有11分喺第4節關鍵時刻取得，協助勇士完成4連勝。不過全場最搶鏡嘅，反而係拎到29分嘅奇利湯臣！
奇利湯臣玩埋「自制助攻」
話說第1節打咗無耐，奇利湯臣作勢起手，實情分波畀內線嘅古辛斯，但「表弟」冇為意傳球搞到中頭獎，點知「湯神」反應超快，即時執番個波跳射得手，最搞笑係入波後二人分別舉手慶祝，好似係完成咗一個好勁嘅短傳配合咁，真係要寫個「服」字畀佢哋！