富力R&F夢想FC廣州鬥法

省港盃功臣避戰

主場出擊的富力R&F，自上月底於菁英盃擊敗佳聯元朗後，有接近兩星期沒有比賽，主教練楊正光指出：「主力都隔咗一排冇比賽，幸好呢段時間可以畀我哋受傷嘅球員休息，基本上除咗羅拔圖，其他都可以候命。」

港隊蟬聯省港盃其中兩位功臣中堅梁諾恆、前鋒袁振昇在兩回合均有上陣，「楊Sir」透露陣容會有所調整：「操練時大家都溝通過，休息對『細佬』（梁諾恆）嚟講會好啲，袁振昇就有機會先任後備。」

客軍夢想FC同樣面對缺賽的問題，主教練梁志榮表示不擔心球員狀態回落：「其實呢兩個禮拜我哋經常試陣，分隊賽強度都比訓練高，所以狀態都保持得到。休息可以紓緩球員疲態，希望新一年我哋由頭嚟過，成績會慢慢好番。」

早前出戰省港盃的門將謝家榮、翼鋒林樂勤未有隨夢想FC北上，「梁Sir」坦言：「謝家榮踢省港盃傷咗，林樂勤之前大腿有傷，成個12月都冇跟我哋練波，我唔想冒險，始終佢冇跟足，唔知我哋要做啲咩，所以今次冇帶佢上嚟。」

陳焌鏗廣州直擊