夏登勁到噴汁
想守死夏登？冇咁易！NBA勁旅火箭昨於主場挑戰西岸「一哥」金塊，雖然火箭首席球星夏登幾乎全場不斷畀金塊球員夾擊，但打法全能嘅佢又點止得單打獨鬥一招，憑住「大鬍子」全場交出14次助攻，成功瓦解金塊防守體系，最後夏登得32分、5個籃板同14次助攻全能數據，帶領火箭以125比113取勝，近12仗贏出10場，認真犀利。
面對金塊嘅不斷夾擊，令到夏登喺首節只得1次出手，但佢被調離場之前，一口氣交出4次助攻，自然逼令金塊作出變陣防守。不過，一旦對夏登嘅防守壓力減輕，自然成為呢個「大鬍子」發威之時。結果夏登全場18投7中，三分球15射6中，加上罰球15射12中，獨得32分，而佢更加係連續10場射入5個三分球以上添！
火箭群星射到着火
當然，今場多得夏登助攻帶動下，最大得益者係佢隊友卡比拿，呢位大前鋒交出職業生涯新高嘅31分，隊友PJ杜卡則同樣射入生涯最多嘅7個三分球錄得21分，成為咗另一位贏波功臣。場波打到最後階段，當夏登又憑三分球博得犯規「And 1」，企上罰球線時，球迷都向佢大叫「MVP」，以夏登近期弗成咁，呢個稱號絕對當之無愧！