轉型助教學習管理之道 呂志興換衫冇換心

以球員身份效力和富大埔14載的呂志興,今季轉型擔任球隊助教繼續貢獻大埔之餘,同時期望從主教練李志堅身上學習更多:「去到職業層面,我覺得管理方面好重要,呢兩三年喺堅Sir身上都有啲得着,因為個個球員都識踢,點樣去配合人腳,管理球員生理、心理及狀態起伏都好重要。唔同教梯隊,教梯隊反而技術、戰術執行方面都比較重要。」

由「興哥」搖身一變「呂Sir」,呂志興身上的衣服也與從前不一樣,但為大埔盡心盡力的心態始終如一:「目前都係學習階段,我主要幫受傷球員做恢復訓練,仲有協助龍門訓練。雖然自己都唔係好熟習,初頭唔係好掌握到,不過李瀚灝、曾文輝都係香港頂級龍門,又有龍門教練牌,我會問佢哋同埋其他龍門教練點樣去做好啲。」

對年輕一代循循善誘

目前擁有亞洲足協C級教練資格的「呂Sir」,除了在一隊協助訓練外,也在青年梯隊中擔任教練,他認為年輕人要循循善誘:「依家新一代要溝通多啲,多啲喺佢哋角度諗下,可能你鬧一鬧,佢哋諗唔通就以後都唔嚟。」他續說:「我成日同佢哋講,人哋話你,要諗下究竟有冇話錯你,如果冇,咁你就唔應該嬲。如果人哋話你渣,你覺得自己唔係,咁就要做好畀人睇,你同佢口舌之爭係冇用嘅,要用表現話畀人聽自己唔係咁。」然而循循善誘並不代表可以任意妄為:「我嘅要求係佢哋要做一個有責任心嘅人,譬如去到球隊,出席訓練係必須嘅,如果嚟唔到一定要有交帶,因為我覺得要每個人都做好先可以凝聚球隊。」

早在5、6年前開始,「呂Sir」便為大埔區組織足球相關活動。起初雖有所不足,但只要從失敗中學習,沒有一件事是無法做到的:「起初自己好多嘢都唔識,好多嘢都做得唔好,返嚟嘅Feedback(回饋)唔太好。吸收經驗後第二次做自然妥妥當當,仲會畀人讚。因為有第一次嘅經驗,每樣嘢都跟足,去到依家都OK嘅!」

僅合格爸爸感虧欠小公主

「呂Sir」現時育有一名3歲半女兒,多年來為大埔立下不少功勞的他,卻自覺虧欠這位「小公主」:「自我畀分嘅話,僅僅合格囉,10分滿分可能得5、6分。其實同佢一齊梗係開心,不過有時畀佢話阿爸唔陪佢,聽老婆講試過去聚會,阿女成日都講:『我下次就有爸爸陪!』聽到呢啲覺得自己唔好,要努力做一個好爸爸。平時自己多嘢做,辛苦老婆照顧個女,到夜晚先得閒同到佢玩,不過都開心嘅、親密嘅。」他又期望能在未來彌補:「假期時我會想同佢去野餐,喺大自然嘅地方周圍跑吓、玩吓,因為每次同佢都係食飯、打邊爐,都冇乜去大自然嘅地方。」

Profile

•出生日期:1984年1月10日

•身高:1米79

•體重:74公斤

•位置:中場、後衞

•曾效力球隊:流浪、大埔聖約瑟

•現效力球隊:和富大埔

•職位:助教

文:陳焌鏗