明星賽正選不保 夏登扯火玩殘勇士

占士夏登（右）瘋狂表現將勇士主將杜蘭特比下去。（美聯社圖片）

三分球奠勝助火箭6連捷

夏登第2節畀盧尼打中下巴返更衣室治理，搞到火箭半場落後17分，夏登下半場出番嚟就勁炸三分球追分，包括臨完場前強行喺對方夾擊下起手射入，獨力玩殘勇士。夏登埋單獲44分、10個籃板同15次助攻，連續5場得分「40+」及連續11場得分「30+」，只可以用瘋狂嚟形容。不過明星賽首輪投票又係另一回事，夏登唔止票數大幅度落後票王勒邦占士，喺西岸後場票數亦少過居里同戴歷羅斯，意味佢喺明星賽未必有正選，肯定頂住度氣。

• 馬刺迪羅辛（右）與速龍李安納同場倒戈成焦點。（法新社圖片）

同日速龍作客以107比125輸畀馬刺，速龍主將李安納倒戈交出21分，但由於路維因背傷缺陣，導致速龍兩連勝結束。今季由速龍過檔馬刺嘅迪羅辛錄得21分、14個籃板同11次助攻「3雙」，助球隊3連勝！