狂轟45分射爆綠軍 夏登豪言再擸MVP
火箭尋日喺NBA主場以127比113擊敗「綠軍」塞爾特人，占士夏登瘋狂攻入45分，近8場平均每場取得40.5分，再次開啟MVP模式，但即使係咁，湖人嘅勒邦占士依然第3次被《美聯社》選為年度最佳運動員，難怪有網友問，到底大鬍子有乜嘢差過大帝？
由於基斯保羅養緊傷，帶傷上陣嘅夏登喺第1節已火力全開攻入17分，包括三分球8投5中，結果佢全場有45分、2個籃板同6次助攻，個人射入9個三分球，帶領火箭3連勝。另一方面，艾榮有23分、5個籃板同11次助攻，但係都阻唔到塞爾特人2連勝結束。
今場係夏登職業生涯第22次得分「45＋」，壓住勒邦占士位列現役球員第1位，同時係夏登連續8場得分「30＋」，個人近8場平均每場得分40.5分，而且佢射入9個三分球，創出個人單場射入最多三分球紀錄，帶領火箭近9場贏8場，賽後「大鬍子」都唔怕畀人話佢自大，夏登咁講：「我當然應該進入MVP競爭行列，雖然好多人鍾意抹黑我，但都阻止唔到我統治比賽。有資格爭MVP嘅人唔多，不過老實講，呢個獎會再次落入我手中。」
咖喱仔甩拖累勇士輸波
同日，勇士喺主場加時後以109比110不敵拓荒者，「咖喱仔」史堤芬居里有29分、5個籃板同7次助攻，但佢喺第4節結束前0.2秒，開界外球竟然失手，搞到伊古達拿完成唔到絕殺，即使杜蘭特獲3雙攻入26分、10個籃板同11次助攻，最後勇士都要錄得2連敗。