聖誕將至，各位諗到頭爆都未諗到送乜禮物畀至愛？家陣有一種世界上最奇特嘅聖誕禮物面世，就係球星嘅DNA，問題係收禮嗰個要嚟做乜呢？
瑞超球隊AIK蘇納最近挖空心思，推出前隊長尼利斯祖漢臣嘅「DNA聖誕禮盒」，唔只附帶一件波衫同隊長臂章，裏面仲有一筒白色粉末，裝咗呢位現年38歲仁兄嘅DNA，售價要340歐元（約3,026港元），一啲都唔平喎。
你可能唔知祖漢臣係乜水，呢位瑞典後衞系出名門，千禧年代踢過拜仁慕尼黑，2001年幫紐倫堡升上德甲，20年足球生涯入面仲曾經效力布力般流浪、李斯特城同AIK蘇納等著名球會，今年2月因心臟缺陷而宣布掛靴。
據知，呢個DNA聖誕禮盒生產咗371盒，上個月已經上架，銷路係點就冇人知，不過會唔會有人攞嚟複製尼利斯祖漢臣呢？佢笑住咁講：「好有侏羅紀Feel，可能500年之後，係會見到好多尼利斯祖漢臣周圍行嚟行去，邊個知呢？不過裏面只得我嘅99%DNA，有部分抽起咗，以免引致非法行為。就算有人複製，嗰個我可能係擅用右腳而唔係左腳。」