一日未吹完場雞，一日都仲有變數！昨日NBA常規賽出現罕見笑料，黃蜂主場迎戰活塞鬥得激，主隊最後憑林比喺0.3秒射入絕殺贏108比107，不過呢球波係「非一般絕殺」，事關林比嘅隊友因為太早衝入場慶祝，結果畀球證吹罰技術犯規，幾乎累事！
賽事去到最後倒數時刻打成106比106，進攻嘅黃蜂拖到最後0.3秒先至由林比起手建功，正當球隊上下瘋狂慶祝，3個裁判突然走埋一齊商議兼睇慢鏡，原來當林比射出嘅波仲喺空中嗰陣，佢哋隊友已經衝定入場慶祝，率先走入場嘅蒙克成為黃蜂場上第6個球員，之後輪到比約保再到其他球員，按例要被罰技術犯規兼罰球，如果「數人頭」計，隨時畀活塞反絕殺！
不幸中之大幸，裁判最後只係罰蒙克技術犯規罰1個罰球，活塞射入仍要輸107比108，而黃蜂班主米高佐敦更被影到喺後備席「懲罰」蒙克，開玩笑咁打佢2下。