靚灘插拖鞋當龍門 黃梓浩：我來自石澳
如果在街上隨便找幾個途人，問他們對石澳的印象，想必一定是「打卡」。但如果把這條問題放在本地足球，答案會是東方龍獅左閘「王子」黃梓浩。「王子」家住位於香港南區的石澳，交通不便，卻可專注發展足球事業：「呢度得一個沙灘，冇乜嘢玩，通常我練完波返嚟都係打吓機，放假好天就會游水練氣。」
自小已四處奔波、長途跋涉到不同球場練習、比賽，「王子」坦言最怕兩個地方：「最唔想一定係天業路（天水圍）、湖山（屯門），因為路程真係好遠。」有些時候訓練時間在晚上，「王子」還要與時間競賽：「其實小學、中學都比較近石澳，搭一程車就去到，細個練波最遠試過去屯門、元朗，都試過冇車返屋企，要焗住搭的士。自己知要趕車，所以盡量沖涼沖快啲，趕尾班車。」
為熱情街坊踢好波
在訪問中，「王子」多次提及石澳沙灘，原來這是他小時候和朋友的「訓練基地」：「細個嗰陣，差唔多年紀嘅鄰居都好鍾意踢波，求其有個位都當係龍門咁射，到大個啲就會去沙灘插拖鞋做龍門。」也許是石澳人口較少，鄰里之間關係十分融洽，還時常關心「王子」的近況：「省港盃入波，嗰日報紙都多街坊睇，佢哋留意到都會講，不過耐咗就冇講喇。佢哋仲成日問我有冇得踢，我都係照直講，有就有，冇就冇。」街坊的支持為「王子」增添一分動力，他誓言：「唔單止為街坊，為自己、為屋企人都想踢出成績。」
訪問當日，當黃梓浩的東方龍獅隊友得悉記者要與他遊石澳時，都紛紛提醒記者，指去到石澳要說認識黃梓浩。對此，「王子」雖不同意，但仍笑說：「佢哋玩我啫，入嚟千祈唔好響我朵，仇人多呀嘛，哈哈！」眾所周知，石澳是個旅遊熱點，問到石澳3大特色時，「王子」豪言：「我覺得石澳個沙灘係香港最靚嘅，仲有好獨特嘅屋，沿途行入去村入面，見到啲屋裝修、顏色都幾靚，最後一樣石澳先有嘅，就係我！」
黃梓浩Profile
出生日期：1994年3月7日
身高：1米74
體重：64公斤
位置：左後衞
球員號碼：30
現效力球會：東方龍獅
曾效力球會：黃大仙、夢想駿其、理文流浪
圖/文：陳焌鏗