當錫上演「奇迹11分」
講起NBA嘅歐洲球員代表，相信大部分球迷會率先諗起「德國槍」魯域斯基，呢位獨行俠40歲老將今季因傷仲未上過陣，不過佢後繼有人，獨行俠另一位歐洲新星當錫乘勢喺聯盟大放異彩，呢位19歲嘅斯洛文尼亞前鋒被視為今屆NBA最佳新人熱門，尋日常規賽更演繹「奇迹11分」，帶領獨行俠主場107比104打爆火箭！
助獨行俠反勝火箭
當錫今季平均數據有18.1分、6.5個籃板同4.3次助攻，得分係眾新人之中排第1、助攻就排第2。雖然近期狀態回落，今場對火箭上半場更只得9射1中，但去到第4節最後唔夠3分鐘佢上演神奇一幕，當時獨行俠落後緊94比102，當錫突然上身瘋狂連入11分，當中包括3個三分波，獨力打出一段11比0攻勢，帶領獨行俠反勝火箭。
獨行俠教練卡素爾賽後話：「好明顯當錫着晒火，佢好似乜都唔驚，最後嗰3至4分鐘真係好神奇！」當錫今場埋單獲22分、7籃板同3次偷波，加上隊友迪安迪佐敦搶到20個籃板，夾手夾腳助獨行俠贏波。