凱景鬥佳聯元朗燃點青春火
「中銀人壽香港超級聯賽」今日上演獨腳戲，凱景於主場深水埗運動場力鬥佳聯元朗。兩支球隊均以年輕球員為骨幹，今仗將是他們展現能力的好機會，同燃「青春火」下必搏到盡！（周日下午2時30分開賽）
凱景上仗一度領先夢想FC，惟最終以3比4落敗，未能打開聯賽勝利之門，主教練馮凱文坦言失望：「上場一啲好低級嘅防守錯誤導致輸波，唔單止係華人，連外援都犯呢啲錯，難免失望。」今仗面對本季表現驚喜的元朗，「馮Sir」點出勝負關鍵：「信心喇，我有睇元朗對富力場波，元朗班球員作客下都好有信心想去贏，呢樣嘢係我哋欠缺嘅。」「馮Sir」又表示球隊會作出改變：「今個禮拜我會同其他教練商討吓，無論位置、陣式定踢法上都會有啲微調。」
郭嘉諾：勝負外更想睇到「未來」
客軍佳聯元朗早前休戰達一個月後，上輪即北上作客富力R&F見負，主教練郭嘉諾同樣認為球隊需改善防守：「目前我哋踢咗8場波，場場有波入，好嘅地方要保持，同時我哋都要踢一啲唔失波嘅賽事，防守嘅緊密性及預謀要做好啲。」元朗與凱景球員大部分均為年輕小將，「郭Sir」期望雙方都能踢出鬥志：「今場波我唔想將勝負睇得咁緊要，因為兩隊都係想畀青年球員機會，希望班球員展示到畀球迷睇，佢哋係香港未來，而唔係一隊贏一隊輸就算，好想見到佢哋嗰團火！」
陳焌鏗報道