暗示來季唔會去湖人 杜蘭特︰做占士隊友太麻煩

居里42分勇士挫騎士

史堤芬居里喺第1節已攻入17分，最後佢嘅3分14投9中，全場取得42分、9個籃板同7次助攻，加上杜蘭特有25分、10個籃板同9次助攻，造就勇士輕鬆贏波。賽前杜蘭特仲同記者講，好鍾意三藩市，暗示未必會喺出年夏天離隊。

原本有消息話，杜蘭特考慮轉投湖人幫助勒邦占士，但佢同記者講，幾乎冇人想同大帝合作：「如果你係高華，你就適合同占士搭檔，因為你多數唔係球隊進攻第一選擇，但如果你係李安納，咁就行唔通，因為你鍾意有波喺手。」

杜蘭特解釋，現時好多年輕球員，都唔需要隊友好似勒邦占士咁樣，大量時間控球在手，而且佢覺得做大帝隊友太麻煩：「傳媒太集中報道占士，佢身邊嘅人會受到過度關注，咁唔係籃球嘅本質，我明白點解有啲人唔鍾意呢種氣氛，簡直有毒咁。」

另一方面，湖人喺主場以121比113擊敗馬刺，勒邦占士取得42分、5個籃板同6次助攻，包括喺第4節開「統治模式」獨得21分，帶領湖人完成4連勝。相反，艾迪列治取得21分、9個籃板同1次助攻，阻止唔到馬刺連輸2場繼續沉淪。