鄭子森追隨他成長！
今夏加盟和富大埔的鄭子森，早於17歲便跟理文流浪簽下首份職業球員合約，但當時要兼顧學業，未能出席球隊所有訓練，自然影響上陣機會。去季效力理文經過菁英盃的洗禮後，加上今年正式告別校園，「森仔」希望能夠在伯樂「堅Sir」（李志堅）指導下，在球員生涯上有所突破！
認清弱點首要改善體能
早於12歲跟朋友一起參加葵青區區隊的鄭子森，17歲那年獲理文流浪垂青，但要待至去季效力理文才迎來職業球員生涯的「處子戰」。一向對自己有信心的「森仔」，坦承上季菁英盃賽事令他看清自己弱點︰「當年17歲簽咗第1份職業合約，但都未有機會上場，到上年轉咗去理文，開始喺菁英盃搵到機會，不過嗰時仲係邊讀邊踢，唔係全職，所以訓練量冇其他球員咁多，但4場菁英盃都獲正選上陣兼踢足。其實踢落去就覺得自己係有信心去踢，教練亦畀咗好多簡單指示我，覺得最不足係喺體能上，踢到80分鐘左右體能就開始下降，有啲抽筋迹象，呢方面要落多啲工夫。」
問到今季轉投「綠戰士」主因，「森仔」直指是對主教練李志堅的足球理念有所認同︰「『堅Sir』同我傾咗好多未來計劃同展望，傾咗一兩個鐘，同埋見到『堅Sir』帶起咗好多球員，例如黃威、『嘉耀』（李嘉耀）、『大佬』（梁冠聰）、『樂仔』（陳俊樂）等，我好信任『堅Sir』，始終踢波最想遇到一個伯樂，希望佢帶領我去成長，追隨一班師兄嘅步伐，好似佢哋咁入選港隊。」
爭取多上場及首個士哥
鄭子森今季曾先後在高級組銀牌賽及菁英盃後備上陣，在球隊下半季需應付亞協盃戰線下，「森仔」決心定下目標︰「我對足球嘅熱誠大過身邊所有人，亦好想不斷進步，唔想停留原地。上年計埋聯賽後備總共出咗5次場，今年希望呢個數字可以雙倍，同埋攞到首個職業入球。」雖然「森仔」承認自己喜愛盤扭，但他透露從隊友身上學會在悅目足球和進攻效率中取得平衡︰「伊高沙托尼係香港數一數二嘅外援，無論扭波同射術都一流，佢臨場判斷真係好快，可以扭過對手入波之餘，亦製造到機會畀隊友，好值得我學習。」
圖/文：何彥霆