陳凱柏我要做大港腳！！

陳凱柏目標成為香港代表隊成員。

陳凱柏在8歲時加入南華青訓精英班時，便跟「Cow Sir」（陳志康）結緣，結果Paco之後一直跟隨這位恩師10年，先後於灣仔南華及太陽國際合作，由於兩師徒同姓之餘，亦有不少共通點，並曾經引起過球圈中人的誤會︰「我同『Cow Sir』都算係有緣，我係踢訓練班識到佢，當時佢仲係球員，佢一路帶住我哋去踢波，嗰陣已經覺得佢係個好好嘅教練，我哋一班球員由細跟到佢大，佢都好睇重我，可能咁啱位置上又相同啦，又係左翼，大家又係用左腳，大家都係比較細粒，屬於速度型。我記得之前去過代表香港隊青年軍，由『岑Sir』岑國培教，佢問我係咪『Cow Sir』啲親戚，因為大家都好似樣，位置又係一樣。」

對於自己上季在菁英盃4場分組賽正選上陣的賽事，Paco則坦言初時覺得自己表現不錯，直至後來翻看比賽片段才發現自己的不足，不過他亦慶幸無論教練或隊友也樂於向他提供指導︰「大家成日都話我first touch做得唔好，所以導致個過程做得唔好，其實好多隊友例如『文輝』（陳文輝）、狄卡奧都有同我講，第一腳攞波要點樣攞同攞去邊，攞個波要半轉身，一啲好微細嘅嘢。Ricky Sir都有同我講，練波唔係見到有乜就去做，要注重啲細節上嘅嘢，咁樣先會進步，因為幾個細節位就足以鑄成大錯，所以都好多謝班隊友，個個都好關心好睇住我，雖然佢當我係o靚仔，但係落到場就係隊友，有嘢提點或者鬧都會照直講，對我嚟講都係好事嚟，等我知道自己有咩做得唔好。」

陳凱柏結緣陳志康

即使要兼顧學業，陳凱柏練波時同樣全程投入。

「未雨綢繆」先放膽追夢

Paco目前正於浸會大學修讀運動及康樂學副學士課程，令他每周可能缺席1至2課操練，但他認為「未雨綢繆」是讓他放心追夢的最佳途徑，同時令家人毋須擔心自己前途的同時，亦可以繼續擔任跟足球有關的工作︰「我希望嚟緊呢兩年可以完成埋個學士學位，之後就去可以踢全職。其實修讀完個課程後，係可以去做教練，因為我哋依家都開始做teaching plan（教學計劃），要知道對住學生點樣去鋪排一個訓練，始終課程同運動有關，嚟緊會讀營養學，對自己作為球員都有幫助，到時讀完除咗喺知識上之外，自己係運動員嘅身份都會令自己更有競爭力同說服力。其實我想多謝屋企人、朋友同女朋友，佢哋都好支持我踢波，每次我有比賽佢哋都會嚟睇。踢波可以算係追夢嘅一件事，可能係我呢世人覺得最有意義嘅事，終極目標係將來可以出外踢波同代表『大港腳』！」

文／圖：何彥霆