連敗兼內訌勇士立立亂

復出嘅居里初段未搵到手感，9投僅2中得7分，之後雖然上番力，全場攻入27分、5個籃板同3次助攻，隊友杜蘭特有28分、6個籃板同7次助攻，但活塞憑格芬及杜蒙特夾埋入42分，後者更喪搶19個籃板，創出5連勝。

咖喱仔復出仍負活塞

勇士更麻煩喺爆出分裂事件後，積蒙格連報稱右腳腳趾有傷，近期一直缺陣，但其實佢同記者講過預計會同「咖喱仔」一齊復出，點知最後都冇得打。美國傳媒亦火上加油話格連只係腳趾整親，冇理由抖咁耐。積蒙格連係咪真傷，或者要勇士管理層至知，問題係就算佢確定復出，佢同杜蘭特嘅關係始終係更衣室「炸彈」，兩人反面唔係秘密，積蒙格連成日批評杜蘭特信自己多過信隊友，隨時拖垮勇士成績。

同日火箭主場以121比105擊敗公牛，占士夏登獲30分、6個籃板同7次助攻，加上基斯保羅有12分、3個籃板同13次助攻，結果火箭喺佢傷愈復出後兩連勝，至於6連敗嘅公牛就排喺東岸尾二，形勢唔多樂觀。